Катедрата за македонски јазик ја има честа нејзин основач и прв раководител да биде великанот на македонската наука за јазикот – професорот Блаже Конески, во чија чест и Филолошкиот факултет денес го носи неговото име. Покрај Конески, први наставници на Катедрата биле и д-р Васо Томановиќ и Крум Тошев, а веднаш по нив, во првата генерација наставници на Катедрата, се вбројуваат и д-р Радмила Угринова-Скаловска и д-р Божидар Видоески. Десетина години подоцна, во 50-тите години, на Катедрата доаѓаат и други видни имиња: д-р Оливера Јашар-Настева, д-р Ружа Паноска, како и Александар Џукески, Милка Проданова, Вида Павлоска и м-р Бистрица Миркуловска. Во 70-тите години на Катедрата ѝ се приклучуваат и д-р Живко Цветковски, д-р Стојка Бојковска, д-р Мито Миовски, д-р Лилјана Минова-Ѓуркова, д-р Кирил Конески, д-р Људмил Спасов, д-р Коста Пеев и д-р Илија Чашуле. Во 80-тите години Катедрата се збогатува со имињата на д-р Димитар Пандев, д-р Емилија Црвенковска, д-р Катерина Велјановска, д-р Чедомир Стојменовиќ, д-р Томислав Треневски, д-р Гордана Алексова, д-р Славица Велева и д-р Елена Петроска. Последниот поголем прилив на наставен кадар на Катедрата се случи во 90-тите години: д-р Анета Дучевска, д-р Татјана Гочкова, д-р Љубиша Станковиќ, д-р Ненад Вујадиновиќ, д-р Лидија Аризанковска, д-р Марјан Марковиќ, д-р Симон Саздов, д-р Искра Пановска-Димкова и д-р Станислава-Сташа Тофоска.

Во следните 25 год. Катедрата се подмлади само со тројца наставници/соработници: д-р Марија Паунова (2003) и м-р Бобан Карапејовски и м-р Бојан Петревски (2018).

Во моментов, наставниот кадар на Катедрата го сочинуваат 16 члена, од кои 12 редовни професори: д-р Емилија Црвенковска, д-р Димитар Пандев, д-р Томислав Треневски, д-р Катерина Велјановска, д-р Славица Велева, д-р Анета Дучевска, д-р Татјана Гочкова, д-р Лидија Аризанковска, д-р Марјан Марковиќ, д-р Симон Саздов, д-р Станислава-Сташа Тофоска, д-р Искра Пановска-Димкова; еден вонреден професор: д-р Марија Паунова, еден доцент: д-р Гордана Алексова и двајца асистенти: м-р Бобан Карапејовски и м-р Бојан Петревски.

Со воведувањето на ЕКТС, Катедрата постојано ги приспособува своите студиски програми кон барањата на современата наука и пазарот на трудот, па нудела и нуди повеќе студиски програми: македонски јазик – применета (апликативна) насока; македонски јазик и книжевност – наставна насока; македонски јазик – двопредметна насока; македонски јазик како втор главен предмет – македонистика (двопредметна). Од учебната 2008/2009 г. се отворија и нови студиски групи: српски јазик, словенечки јазик и хрватски јазик, на кои се запишуваат студенти наизменично на секои четири години.

Паралелно со наставата на додипломските студии, Катедрата успешно продолжува со организирање и на постдипломски студии ‒ втор циклус студии од студиската програма Македонски јазик, а учествува и во третиот циклус студии од областа Македонистика на Школата за докторски студии при Универзитетот „Св. Кирил и Методиј“ во Скопје. Во оваа настава учествуваат наставниците од Катедрата, но и од други сродни институции, како и истакнати македонисти. Преку овие два степена на образование, голем број дипломирани професори по македонски јазик се стекнале со звањата магистер и доктор по филолошки науки од областа македонски јазик.

Членовите на Катедрата учествуваат во изведувањето на наставата на сите студиски групи на Филолошкиот факултет, а особено на студиските програми на Катедрата за македонска книжевност и јужнословенски книжевности, Катедрата за превод и толкување и на Катедрата за албански јазик и книжевност. Наставниците и соработниците од Катедрата изведуваат настава по македонски јазик, како и по други лингвистички предмети и на поголем број факултети во рамките на Универзитетот „Св. Кирил и Методиј“ во Скопје.

Грижа на Катедрата е и организирањето на наставата по македонски јазик на универзитетите во странство. Надоврзувајќи се на оваа активност, Катедрата дала значаен придонес и во организирањето на Меѓународниот семинар за македонски јазик, литература и култура, а преку предавања и изведување лекторска настава зеле учество сите нејзини наставници и соработници. Катедрата организира и курс по македонски јазик за странци, за странски студенти што студираат на Филолошкиот факултет „Блаќе Конески“ и за студенти дојдени по пат на размена.

Меѓународната соработка на Катедрата е видлива преку многубројните студиски престои на наставниот кадар на повеќе универзитети во различни држави во светот (како гости-професори или како лектори), а истовремено и голем број видни имиња од лингвистичкиот свет гостувале на Катедрата со свои предавања.

Катедрата се грижи за својот подмладок – за тековните студенти, кои се вклучуваат во организирањето и изведувањето на македонистички вечери, словенистички, хрватски и српски средби, а и за младиот дипломиран кадар кој може да се истакне и да го покаже својот научен интерес преку учество на научниот собир Млади македонисти, кој се одржува во организација на Катедрата за македонски јазик и јужнословенски јазици на секои две години.

Наставниците од Катедрата за македонски јазик за следните генерации студенти и за пошироката јавност имаат оставено и оставаат богато печатено наследство, како во вид на зборници од одржаните научни собири така и во вид на специјализирани монографии и учебници за студентите, но и печатени материјали од многубројните меѓународни и национални проекти со кои раководеле.

Во составот на Катедрата има и библиотека. Својата активност ја започнала со мал број подарени или отстапени книги од Народната библиотека во Скопје, за денес бројот на книгите да изнесува над 15.000 наслови и списанија. Списанијата обично се набавуваат по пат на размена со домашни и со други институции од светот.