На 13 октомври 2023 година, во организација на Филолошкиот факултет „Блаже Конески“ – Скопје и на Катедрата за романски јазици и книжевности, се одржа промоција на трудот

DICŢIONARUL DIALECTULUI MЕGLЕNOROMÂN ACTUAL

(general şi etimologic)

DICTIONNAIRE DU DIALECTE MÉGLÉNOROUMAIN ACTUEL

(général et étymologique)

РЕЧНИК НА СОВРЕМЕНИОТ МЕГЛЕНОРОМАНСКИ ДИЈАЛЕКТ

(општ и етимолошки) 

oд авторот проф. д-р Петар Атанасов

Промотори:

aкад. Аугуст Ковачец, Хрватска академија на науките и уметностите, Загреб

д-р Емил Цркомнику, Институт за етнографија и фолклор „Константин Браилоју“, Букурешт     

На промоцијата свое обраќање имаа проф. д-р Владимир Мартиновски, декан на Филолошкиот факултет „Блаже Конески”, Н.Е. г-ѓа Адела-Моника Аксинте, Амбасадорка на Република Романија во РС Македонија, проф. д-р Јоана Хаџи-Лега Христоска, раководителка на Катедрата за романски јазици и книжевности, г-ѓа Даниела Г’тман, државен секретар во Министерството за надворешни работи на Република Романија и проф. д-р Звонко Никодиновски кој ги прочита рецензиите од aкад. Аугуст Ковачец (Хрватска академија на науките и уметностите, Загреб) и од д-р Емил Цркомнику (Институт за етнографија и фолклор „Константин Браилоју“, Букурешт). На крајот од настанот, на публиката ѝ се обрати и самиот автор, проф. д-р Петар Атанасов.

Професорот Атанасов е долгогодишен професор на Катедрата за романски јазици и книжевности, истакнат лингвист и романист со меѓународно реноме. Романистиката е главната преокупација на целиот негов работен век на Катедрата: најпрво преку реализирањето на наставата по предметите поврзани со неколку романски јазици во чие воведување имаше клучна улога, но пред се’ преку неговата научна работа. Професорот Атанасов не е само автор на бројни трудови со романистичка и балканистичка тематика, туку е автор и на повеќе речници кои до денес им се неодминлива алатка на сите оние што се интересираат за таа тематика. Но централното место во неговата научна работа е неговото проучување на мегленороманскиот, неговиот роден говор, најпрво преку неговата магистерска теза „Инфинитивот во мегленороманскиот во светлината на романските и балканските јазици“, но и со докторската теза „Мегленороманскиот денес“ објавена на француски јазик во Хамбург (1990) и на романски јазик во издание на Романската Академија (2002). Со заминувањето во пензија, научничката љубопитност на професорот Атанасов не згаснува. Имајќи го предвид фактот дека мегленороманскиот, како дел од јужнословенскиот романитет, е во процес на бавно, но сигурно исчезнување, негова мисија е да го спаси од заборав со тоа што ќе го опише во своите трудови додека сè уште има активни говорители на овој говор. Поминува долги години во макотрпни теренски истражувања, што резултираат со изработката на два тома од „Лингвистичкиот атлас на мегленороманскиот дијалект“ во издание на Романската Академија (2008 и 2013), прв лингвистички атлас што се појавува во нашата земја. Недостигаше уште речник на мегленороманскиот, но денес и него го имаме пред нас, издание со кое сите ние треба да се гордееме. Исчезнувањето на еден јазик или на еден говор е истовремено згаснување на еден народ, на една култура и традиција. Токму поради тоа ова дело е врв на лексикографската дејност на професорот Атанасов: низ неговите страници се испишани минатото и сегашноста на мегленороманското население, неговиот светоглед, неговите контакти со другите балкански народи и јазици.