Дипломирал англиски и шпански јазик и книжевност и магистрирал на Филолошкиот факултет „Блаже Конески“ во Скопје, а од 2019 година е докторанд на Филолошкиот факултет во Белград. Главни полиња на истражување му се хиспанистиката, сервантистиката и книжевната рецепција. Работи на докторска дисертација за рецепцијата на Мигел де Сервантес и шпанската книжевност на Златните векови во современата македонска книжевност и култура. Покрај наставно-научната работа, се занимава со аудиовизуелно и со книжевно преведување, за кое е добитник на две награди: „Златно перо“ за најдобар превод во 2018 година и „Ванѓа Чашуле“ во 2023 година за најдобар превод од шпански јазик. Негови преводи се објавени и во повеќе антологии.

Во рамките на наставата на Групата за шпански јазик и книжевност при Катедрата за романски јазици и книжевности е ангажиран во континуитет од 2017 година, како надворешен соработник, демонстратор и асистент, за изведување вежби по предмети од шпанската и хиспаноамериканската книжевност, како и по преведување од шпански на македонски јазик и обратно.

Учествувал во меѓународниот проект „Шпанскиот јазик во Европа“ со проф. д-р Сања Михајловиќ-Костадиновска (Универзитет во Љубљана, Универзитет во Белград, Центар за ибероамерикански студии при Универзитетот во Хајделберг, Универзитет во Цирих, под спонзорство на Институтот Сервантес), како и на научните конференции ESIDRP (Филолошки факултет „Блаже Конески“ во Скопје, 2022) и Investigaciones en estudios hispánicos: cuestiones palpitantes (Филолошки факултет во Белград, Институт Сервантес, 2023).

Бил член на редакцискиот одбор на зборникот 100 години Блаже Конески и 75 години Филолошки факултет, а актуелно е секретар на одборот на претстојното издание Книжевни преведувачи од Филолошкиот факултет. Исто така, бил ментор по шпански јазик на студентските преведувачки работилници за Блаже Конески и Ацо Шопов.