П О К А Н А

Филолошкиот факултет „Блаже Конески“ во Скопје

Ве поканува да учествувате на 

МЕЃУНАРОДНИОТ НАУЧЕН СОБИР „ФИЛОЛОГИЈАТА ДЕНЕС – ПРЕДИЗВИЦИ И ПЕРСПЕКТИВИ“

18 декември 2026 год.

По повод одбележувањето на двата значајни јубилеи, 80 години од основањето на Филолошкиот факултет „Блаже Конески“ во Скопје, со Решение од Владата на НР Македонија во 1946 година и 80 години од првите предавања, одржани на 16 декември 2026 година, чест ни е да ве поканиме на Меѓународниот научен собир „Филологијата денес – предизвици и перспективи“, кој ќе се одржи на 18 декември 2026 година.

Темата на собирот се однесува на моменталните состојби во филологијата, но и на нејзините перспективи како дисциплина, која денес се соочува со низа прашања и предизвици. Тие првенствено се однесуваат на местото и на интересот за филолошките студии во локални и во светски рамки, особено во однос на подемот на вештачката интелигенција. Во т.н. ера на човекот, обележена со експлозија од информации, технолошки развој и проширување на научните сознанија меѓу различните дисциплини, а со тоа и појава на нови научни дисциплини, научиот собир ќе се обиде да ги маркира промените во човековото влијание врз научното спознание и начинот како се манифестира тоа во процесот на општествената размена. Оваа ера се карактеризира со присуството на човекот како фактор на климатските промени и на промените во животната средина, а филологијата како наука ги следи модусите на репрезентација во различните сфери на споделеното човеково искуство. Предвидените теми на конференцијата ќе се однесуваат на традиционалните методи во филолошките истражувања, како и на актуелноста, односно на современите теориски, интердисциплинарни и други видови перспективи.   

Предложените реферати можат да се однесуваат (но не се нужно ограничени) на една од следните теми:

• Филологијата како античка дисциплина (историја, теорија, практика) и нејзината врска со актуелните состојби.
• Современата филологија како актуализација на традиционалните методи, но и како предводник на нови методолошки потфати.
• Дигитална филологија.
• Филолошките проучувања на јазикот и нивното современо преосмислување.
• Филолошките проучувања на литературата како можност за воспоставување нови парадигми и методи на проучување на литературните дела.
• Преводот како практика/инструмент во епохата на човекот и неговата актуализација преку употребата на технологијата.
• Јазичното, литературното и културното наследство во дигиталната епоха, како ревизија на претходните општествени и културни норми.
• Компаративна/контрастивна филологија – словенските јазици, литератури и култури во интер-/интрасемиотички, пансловенски, но и во европски и во светски контекст.
• Рецепцијата на јазикот, литературата и културата во сопствената средина, но и пошироко, како трансфер на вредности и погледи на светот.
• Проблемот на наставата по странски јазик, литература и култура и предизвиците со кои се соочува во дигиталната ера.
• Филологијата и нејзината перспектива во традиционалниот и во современиот образовен контекст.
• Филологијата во современото живеење, филологијата и политичките/општествените промени.  

УПАТСТВО ЗА УЧЕСТВО И ВАЖНИ ДАТУМИ:

1. Секој автор може да се пријави со еден труд (самостојно или во коаворство) за учество на собирот.
2. Пријавувањето трае до 1 септември 2026 г. на адресата:

80godiniFLF@flf.ukim.edu.mk

1. Авторите ќе добијат известување за прифаќањето на пријавата за учество најдоцна до 1 октомври 2026 година.
2. По завршувањето на собирот, трудовите ќе бидат објавени во зборник. За роковите, формата и обемот на трудовите, авторите ќе бидат дополнително известени од страна на Организацискиот одбор.
3. Работни јазици на собирот се македонскиот, англискиот, францускиот и сите словенски јазици.

Организациски одбор:

проф. д-р Искра Тасевска Хаџи-Бошкова, претседател

проф. д-р Ирина Бабамова

проф. д-р Маријана Ѓорѓиева

проф. д-р Осман Емин

проф. д-р Руска Ивановска –Наскова

проф. д-р Исмет Османи

проф. д-р Бојан Петревски

проф. д-р Елизабета Шелева

доц. д-р Игор Поповски, секретар

д-р Михаил Атанасов Раду, виш лектор, секретар