Филолошкиот факултет „Блаже Конески“ – Скопје се вклучи во меѓународниот проект DAFLS (Developing Applied Foreign Language Skills), поддржан од Еразмус+ програмата. Основната цел на проектот е нашиот факултет, зааедно со еден од регионалните партнери – Филолошкиот факултет при Белградскиот Универзитет (Србија) – да дизајнира и развие студиски програми за применети странски јазици на додипломско и постдипломско ниво. Новите програми не само што ќе ја збогатат понудата за изучување јазици на нашиот факултет, туку и ќе ја зголемат можноста за вработување на идните дипломци и постдипломци, со оглед на тоа што освен специфични јазични вештини, студентите ќе стекнат и други значајни компетенции (од областа на правото, економијата и проектниот менаџмент). Потребата од ваков стручен кадар е очигледна во контекст на глобализациските и евроинтеграциските процеси кои се одвиваат во Скопје и Белград.

Носител на проектот е Универзитетот Каен во Франција, којшто има четириесетгодишно искуство во создавање стручни кадри по применети странски јазици. Исто така, во проектот DAFLS е вклучена и Европската асоцијација за локална демократија (АЛДА Скопје).

Првите состаноци на кои партнерите го презентираа проектот се одржаа онлајн, на 4-ти и 5-ти ноември 2020 г. Проектот ќе трае до август 2023 г.